– Maina Kamanda amefufua tena siasa za madeni akisema Mlima Kenya hauna deni la mtu

– Alisema jamii ya Wakikuyu haitatishwa kumpigia mtu fulani kura 2022

– Mwelekeo wa kisiasa wa Mlima Kenya, kulingana na Kamanda, utatolewa na Rais Kenyatta

Mbunge mteule Maina Kamanda Jumapili, Septemba 15, alifufua tena mjadala kuhusu siasa za deni kati ya eneo la Mlima Kenya na Naibu Rais William Ruto.

Akiongea katika kanisa la AIPCA Nanyuki, Kamanda alisema eneo hil halina deni lolote la kisiasa kwa mtu yeyote na kwa hivyo hakuna atakayelazimu wakazi kumpigia kura.

Habari Nyingine: Maina Kamanda afurushwa kanisani Nanyuki

Hatuna deni lako, Kamanda amwambia DP Ruto

Mbunge mteule Maina Kamanda alisema jamii ya Wakikuyu haina deni lolote kwa mwanasiasa yeyote. Picha: Dennis Itumbi
Source: UGC

“Hatuna deni la mtu sisi, deni la pekee ambalo tulikuwa nalo lilipwa na Yesu Kristo. Kwa hivyo msitishwe na yeyote kuhusu lolote … hatuna deni la mtu yeyote,” Kamanda alisema.

Mbunge huyo alisema kuwa ni Rais Uhuru Kenyatta pekee ambaye atatoa mwelekeo wa kisiasa kwa jamii hiyo kufika mwaka wa 2022 ambapo kutakuwa na kinyang’anyiro cha kumrithi.

“Kura ya Mkikuyu hautapewa kwa nguvu, ati ikuwe ni kama ni bunduki unatuwekelea, apana …sisi kama jamii tuna viongozi wetu, hatuna deni na mtu yeyote, ni Rais Uhuru wetu ambaye atatuonyesha njia,” aliongeza.

Habari Nyingine: Ndindi Nyoro aomba msamaha kuhusu rabsha zake na Kamanda kanisani

Hatuna deni lako, Kamanda amwambia DP Ruto

Rais Uhuru Kenyatta alipokuwa akipiga kampeni za kuingia Ikulu mwaka wa 2013 alisema ataongoza miaka kumi na kisha Ruto kumi. Picha: Uhuru Kenyatta
Source: Facebook

Kamanda amekuwa akiongoza kikosi cha Kieleweke ndani ya chama cha Jubilee ambacho kinapinga Naibu Rais William Ruto na ndoto yake ya kuwania urais 2022.

Mrengo huo umekuwa ukipinga semi za wafuasi wa Ruto kuwa eneo la Mlima Kenya linafaa kumpigia kura DP kwa kuwa aliwavuta wafuasi wake na kumuunga mkono Rais Uhuru Kenyatta kwenye chaguzi za 2013 na 2017.

Wawili hao walipoanza kampeini za kuingia Ikulu mwaka wa 2012, Uhuru alisema kuwa ataongoza miaka yake kumi na kisha kumwachia Ruto kuongoza yake kumi.

Habari Nyingine: Chama cha ODM chateta kusalitiwa Kibra

Huku siasa za deni zikiwa zimeshika moto, Ruto hapo awali alisema kuwa hakuna mtu ambaye ana deni lake la kisiasa.

“Hakuna mtu ama jamii ambayo iko na deni langu mimi,” Ruto alisema mnamo Julai, 9, 2019.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia news@tuko.co.ke au WhatsApp: 0732482690.

Subscribe to watch new videos